An dr 57. Generalversammlig vom 14. Juni 2024 isch dr ganzi Vorstand ney gwäält woorde.

Mer gratelliere em

SERGE ERAY
Vize-Glunggi

und em

KURT GUTHAUSER
Källerchef

zur Waal und wintsche iine vyyl Spass und Erfolg.

Die andere Ämter blyybe vo de glyyche Glunggi bsetzt wie vorhäär.

Oober-Glunggi

Dr Sascha Buser isch syt dr 51. GV unsere neye Obmaa
– ooder «Ober-Glunggi», wie s bi uns richtig haisst.

Vize-Glunggi

Unsere Vize-Glunggi Serge Eray
duet ab 2024 em Oober-Glunggi zur Sytte stoo
und allefalls in allne Cliqueaagläägehaite verdrätte.

Seggelmaischter

Jean-Claude Loosli "Schanggi"
Sy dr 48. GV 2015 het är unser Kässeli iibernoo
und duet s Gäld vo Glygge und Käller mit beschtem Gwisse verwalte.

Källerchef

Kurt Guthauser
Dr Kurt isch syt 2024 unsere neye Källerchef.
Alles was dr Käller betrifft (Källeraaläss und Unterhalt)
isch in syner Obhuet und äär luegt dert zem Rächte.

Schryyber, Zeddelbrinsler & Websytte-Baschtler

Unsere Schryyber Iain Vert fiert syt 2003 alli Protokoll
und anderi Schryybaarbete und pflägt syt 2008 au unseri Websyte
und brinzlet unsere Fasnachtszeedel fiir Basel
wo mir ab em Waage verdaile.

Ehre-Oberglunggi

Alfredo Monigatti
Unsere Fredi isch scho fascht alles gsii in dere Glygge...!
Noo dr 48. GV het äär als Seggelmaischter und Källerchef demissioniert und fir jungs Bluet Blatz gmacht.
Är blybt uns aaber als Ehre-Oberglunggi im Vorstand erhalte, denn syni Erfaarig isch e Huffe wäärt.

Byysitzer + Catering Fachmaa

Hans Frey
Nooch dr Stamm+Alte Garde-Fusion 2021 blybt
äär in Sache "Catering"-Frooge im Käller und an extäärne Aaläss
unseri erschti Waal mit synere langjeerige Erfaarig.